កិច្ចប្រជុំពាក់កណ្តាលឆ្នាំលើកទី១០ នៃកម្មវិធីបរិស្ថានស្នូលមហាអនុតំបន់មេគង្គនៃធនាគារអភិវឌ្ឍន៍អាស៊ី
12-November-2015 | ដោយ មួយឡា
ថៃ៖ នៅថ្ងៃទី១១ ខែវិច្ឆិកា ឆ្នាំ២០១៥ គណៈប្រតិភូមកពីបណ្តាប្រទេសក្នុងមហាអនុតំបន់មេគង្គ រួមមាន កម្ពុជា ចិន ឡាវ មីយ៉ាន់ម៉ា ថៃ និងវៀតណាម បានចូលរួមក្នុងកិច្ចប្រជុំពាក់កណ្តាលឆ្នាំលើកទី១០ នៃកម្មវិធីបរិស្ថានស្នូលមហាអនុតំបន់មេគង្គនៃធនាគារអភិវឌ្ឍន៍អាស៊ី ដែលបាននិងកំពុងប្រព្រឹត្តទៅនៅទីក្រុងឈាងម៉ៃនៃប្រទេសថៃ ចាប់ពីថ្ងៃទី១១-១២ ខែវិច្ឆិកា ឆ្នាំ២០១៥។
ចូលរួមក្នុងកិច្ចប្រជុំនេះផងដែរ រួមមាន តំណាងធនាគារអភិវឌ្ឍន៍អាស៊ី តំណាងប្រទេសស៊ុយអែដ (តំណាងឱ្យដៃគូអភិវឌ្ឍន៍) និងទីប្រឹក្សា ជំនាញការ និងបុគ្គលិកមពីមជ្ឈមណ្ឌលប្រតិបត្តិការបរិសា្ថនមហាអនុតំបន់មេគង្គ។
គោលបំណងសំខាន់នៃកិច្ចប្រជុំនេះ គឺដើម្បីបូកសរុបលទ្ធផលការងារ ដែលសម្រេចបានក្នុងឆ្នាំ២០១៥ និងពិនិត្យពិភាក្សាលើអាទិភាពការងារ បញ្ហាប្រឈម និងឱកាសនានា ដែលត្រូវអនុវត្តនិងដោះស្រាយក្នុងឆ្នាំ២០១៦។
សម្រាប់កម្ពុជា តាមរយៈការគាំទ្រពីកម្មវិធីបរិស្ថានស្នូលមហាអនុតំបន់មេគង្គ ក្នុងឆ្នាំ២០១៥នេះ ក្រសួងបរិស្ថានបាននិងកំពុងចាប់ផ្តើមអនុវត្តសកម្មភាពសំខាន់ៗមួយចំនួន ដូចជា រៀបចំឯកសារយុទ្ធសាស្ត្រ និងផែនការសកម្មភាពបរិស្ថានជាតិឆ្នាំ២០១៦-២០២៣ ការរៀបចំបង្កើតប្រព័ន្ធព័ត៌មាននិងទិន្នន័យបរិស្ថាន ការរៀបចំរបាយការណ៍ស្តីពីស្ថានភាពបរិស្ថាននៅកម្ពុជា ការរៀបចំយុទ្ធសាស្ត្រសម្រាប់ការងារផ្សព្វផ្សាយបរិស្ថាន ការរៀបចំប្រព័ន្ធតាមដានវាយតម្លៃការបំពុលបរិស្ថានពីផ្នែកឧស្សាហកម្ម ការបណ្តុះបណ្តាលមន្ត្រីបរិស្ថានថ្នាក់ក្រោមជាតិស្តីពីការត្រួតពិនិត្យរបាយការណ៍វាយតម្លៃហេតុប៉ះពាល់បរិស្ថានសម្រាប់គម្រោងវិនិយោគក្នុងស្រុក ការបណ្តុះបណ្តាលគ្រូបង្គោលសម្រាប់ការងារប្រែប្រួលអាកាសធាតុ។ល។
កិច្ចការទាំងនេះនឹងត្រូវបន្តអនុវត្តយ៉ាងមមាញឹកនិងសម្រេចបានលទ្ធផលជាផ្លែផ្កាក្នុងឆ្នាំ២០១៦ ដោយទាមទារឱ្យមានការចូលរួមពីក្រសួង ស្ថាប័ន ដៃគូអភិវឌ្ឍន៍ សង្គមស៊ីវិល និងផ្នែកឯកជនពាក់ព័ន្ធផងដែរ៕
ប្រភព៖ ទំព័រក្រសួងបរិស្ថាន
ចំនួនអ្នកទស្សនា
- ថ្ងៃនេះ6171
- ម្សិលមិញ15681
- សប្តាហ៍នេះ65011
- ខែនេះ86891
- ឆ្នាំនេះ86891
- សរុប20529347